Este foi a metodoloxía empregada xeralmente para a gravación da serie:
Cada día entregúoselles a tódolos membros do equipo de gravación (técnicos, actores, equipo de produción...), un PLANO DE GRAVACIÓN, un esquema co traballo a desenvolver por cada grupo nese día. As distintas equipas de produción coñeceron con antelación eses planos de gravación (agrupados no que se chama un PLANO DE TRABALLO), para teren previstas as necesidades de cada día. En ese senso, os equipos foron:

GRUPO DE ATTREZZO

Xestiona e consigue o material de attrezo e escenografía. Encargase de que ese material estea no seu momento no lugar da gravación. Deixan o escenario preparado xusto antes de empezar a gravar, logo marchan. Estarán localizábeis por se faltase algo, caso no que a axudante de produción os avisaría.

Este grupo (2,3 persoas)necesitará conseguir, en principio, os materiais que aparecen na lista "attrezzo". Ademais, para poderen realizar o seu traballo comodamente:

• Seria bo que dispuxesen dun vehículo propio, para que non houbera que andar levándoas aos distintos lugares de gravación.

GRUPO DE CATERING

Xestiona e consegue alimentos e bebidas para o equipo durante a gravación. En todo momento ten que haber polo menos auga e algo de froita para os compañeiros que están gravando, pero o idóneo é sempre que haxa posibilidade de tomar un café ou picar algo. Hai que ter en conta que son moitas horas de traballo, e o feito de parar uns minutos a tomar un bocata pode axudar a que haxa un bo ambiente e a gravación non se converta nun suplicio. Seria interesante, ademais, que se fixese unha comida quente ao día, para relaxarse todo o equipo xunto e intercambiar impresións sobre o traballo realizado. Para iso, Mercedes Vázquez ofrécenos un local na parroquia de Pesqueiras, onde ademais poderiamos centralizar a maquillaxe e vestiario dos actores. Seria interesante propoñerlles aos veciños e veciñas da zona que aportasen algún prato (tortilla, ensalada...) para ese xantar do final ou do medio do día.
As persoas que se apuntasen neste grupo, ademais de solicitaren en distintos establecementos a colaboración, encargaríanse de ir levar os alimentos ou bebidas cedidos ao lugar da rodaxe ou ao local onde se prepararían os actores.

No plano de traballo aparecerán previstas as horas das comidas, así como as pausas para bocadillos. A primeira hora da mañá levarase ao lugar de gravación auga suficiente para toda a xornada, así como algún termo de café e leite, froita... Para isto pode ser necesario contar cunha neveiriña das de camping.

GRUPO DE PRODUCIÓN EN SET

Son dúas persoas no lugar da gravación e dúas no "cuartel xeral" (lugar onde se maquilla, onde esperan os actores...). As persoas que están na gravación irán anotando todas as incidencias: as tomas que se gravan e as que hai que repetir, como se vai con respecto aos horarios previstos... Para isto, terán un "parte de gravación". Se falta algo: algunha prenda de roupa, algún actor, algún obxecto para o decorado ou attrezzo... un dos dous irá busca-lo, ou porase en contacto con a persoa de produción no "cuartel xeral" para que a consiga e a traia.

A persoa no cuartel xeral é a encargada de ter preparados aos actores para entraren a gravar (para o que terán que estar ali con antelación, por se fixese falla caracterizalos, arranxar o vestiario ou a maquillaxe). Cando lles toque entrar a gravar, unha das persoas de produción en rodaxe iravos buscar no coche.
Os actores poderían solicitar que se lles fose a recoller ás súas casas. Esa seria a tarefa dos produtores no "cuartel xeral". Así mesmo, se o equipo de maquillaxe e vestiario tivese algunha necesidade non prevista (suponse que terán planificado o material que lles fará falla), tamén serian os membros da equipa de produción as que intentarían consegui-lo.

O grupo de produción no set é o encargado de repartir as ordes de gravación de cada día ao final de cada xornada de traballo. Cada noite, recordaralle aos distintos membros do equipo (actores, realizadores, maquilladoras...) o plano para cada día: onde se queda, que secuencias hai que gravar, a que hora teñen que estar no "cuartel xeral" (punto de encontro de todos os membros de equipo cada día).

Para facilitar o seu traballo, esta equipa precisa:
-2 coches (mínimo)
-telefono móbil sen problemas de cobertura (difícil; haberá que idear unha maneira para comunicarnos por mensaxes ou por "toques", para non arruinarnos en chamadas)
-unha fotocopiadora que se "enrolle" e nos deixe fotocopiar as ordes diarias de traballo

GRUPO DE PROMOCIÓN E PATROCINIO

As persoas que o forman traballan á marxe das gravacións. A súa función é a de conseguir o maior número posíbel de apoios económicos ou de material por parte das empresas da zona. Para iso, o sistema poden ser as entrevistas formais, a solicitude escrita ou as charlas informais. A medida que se vaian conseguindo compromisos por parte de empresas e institucións, os integrantes deste grupo poñerano en coñecemento dos demais membros do equipo de produción, para que saiban que con esas empresas se pode contar para posíbeis necesidades.
Este grupo intégrano xa Mercedes Vázquez e Comba Campoy, pero podería ser interesante que unha persoa mais se unise a el.